उठो म्हांरा बालक बनडा , करोनी दांतणियो।
केलु रो दांतण म्हांरा लाडला , लांगा के रा कुरला।
इसड़ो दांतणियो थांरो नाई जी कराव ,
नाई जी कराव म्हांरा बनडा , नायण र मन भाव।
उठो म्हांर रुपज रोड़ा , करोनी उगटणो ,
तेल – फुलेल म्हांरा लाडला , केसर के बाटियाँ।
इसड़ो उगटणो थांरो नाई जी कराव ,
नाई जी कराव म्हांरा लाडला , नायण र मन भाव।
उठो म्हांरा बालक बनडा , करोनी कलेवो।
लाडू तो फीणी म्हांरा लाडला , सरस जलेबियाँ ,
इसड़ो कलेवो थांरा दादीजी कराव ,
दादीजी कराव म्हांरा लाडला , दादा र मन भाव।
उठो म्हांरा घण परवारा करोनी जिमनियाँ ,
फिन्नां तो रोटी म्हांरा लाडला , लूणी के रो लचको ,
इसड़ो जिमनिया थांरा माताजी कराव ,
माताजी कराव म्हांर लाडला , पापा र मन भाव।
उठो म्हांरा बालक बनडा , करोनी चाबनियाँ ,
लांग सुपारी म्हांरा लाडला , पाना के रा बिड़ला ,
इसड़ो चाबनियो थांरी भाभीजी कराव ,
भाभीजी कराव म्हांरा लाडला , भायां र मन भाव।
उठो म्हांरा बालक बनडा , करोनी पोढणियां ,
फुलड़ा री सेजां म्हांरा लाडला , झालर रा तकिया।
इसड़ो पोढणियां थांरी लाडलड़ी कराव ,
लाडलड़ी कराव म्हांरा बनडा , लाडलडे र मन भाव।